عن الرهاب الاجتماعي

سألوك؟

هل سألوك عن الرهاب الاجتماعي

و طبعا رحت غرقان في نص هدومك

و لم يسعفك النصف الآخر في الاجابة

فصرت أمامهم بلا هدوم

هون على شخصك

هون هون

انا هنا للاجابة

انا هنا كما كنت دائما

و كما سأكون دائما

منقذك من رشقات عيونهم

الوحشين

لا تبتأس

فأنت مجرد شخص يسأل

لست صاحب المرض على أية حال

*

و كيف أجيبك يا بوب و الموضوع كبييييير

أبدأ منين

دعني أبدأ كأي باحث على صفحات النت المتاحة لأتفه تافه

حين تنبري له صفحة ويكي

الرهاب الاجتماعي هو

ولا أقولك

دعنا نبدأ من قبل هذا

الرهاب يا سيدي

أو الفوبيا كما عند الفرنجة و من مشي مشيهم

هو الخوف الغير مبرر

يعني ان الواحد يشوف أسد غضنفر كده واقف قصاد سعادته

فسعادته لديه كل الاسباب للخوف

واحد سعادته أعزل

بلا أنياب

و بالتأكيد ماعندوش نية ياكل أسد

أما الأسد الغضنفور

متسلح بشعر أهله اللي حوالين راسه

و بأنياب

و ماعندوش مشكلة ياكل جيفة سيادتك كأجمل و أشهي ما يكون الطعام

هذا اذا خوف مسبب

خوف له لزمة

طبيعي يعني

ولو الباشا ماخفش يبقي عنده نقص في بعيد عندك

كرات الدم

اما اللي يشوف اسانسير بيتقفل عليه و يقعد يصوت جوه

فهو عنده خوف حضرتك من الاماكن السوري مغلقة

و كما تعلم يا عزيزي ان الاماكن المغلقة زي الاماكن المفتوحة زي الاماكن النص نص

مافيهاش في حد ذاتيتها حاجة تقلق او تخوف

انما البرنس صاحب الفوبيا بقه عنده اسبابه

يمكن هو نفسه مش واعي ليها

انما أهو عنده

و بذلك يكون مالك لفوبيا

يعني رهاب

يعني خوف من حاجة مابتخوفش

الاماكن المغلقة كمثال

و الامثلة كثييرررررررر

و شر البلية ما يضحك

ده فيه فوبيا اسمها بيبلوفوبيا

يعني خوف من الكتب

اه و الله

المهم

نوع الرهاب اللي سيادتك اتسألت عنه

اسمه العلمي

أنثروفوبيا

يعني الرهاب الاجتماعي

نيجي بقه للمفيد

اللي هو في الواقع زي ما حتشوف مش مفيد ببصلة

تتفق كل المصادر

على انه يبدأ منذ الصغر

بل رجع البعض الي أورر من كده

ورا اكتر يعني

و قالوا انه مرحلة عادية يمر بها اي بشمهندس رضيع

فيفلت منها الطبيعي

و ـ

أيووووه

يوووقع فيها اللي عليه العين

واحد من كل عشرة بني آدم بيقع

الاحصائية مصدرها النت

و النبي مش ناقصة خوتة دماغ

المهم

الرهاب الاجتماعي جزم الكثيرون انه مربوط و مرهون بالخجل الاجتماعي

و الصراحة حاولت افرق بين الاثنين معرفتش

الاثنين مايتخيروش عن بعض

توأم مقندل

المهم برضه عشان ماطولش عليك و انت راجل مش فاضي

الرهاب الاجتماعي يتطور الي مرض نفسي اسمه اضطراب القلق الاجتماعي

بالنسبة للاضطراب و الفوبيا مين قبل مين

اقولك بالظبط زي البيضة الاول ولا الفرخة

طبعا انا اخترت البيضة

انا حر

و انت برضه حر

اختر الفرخة اختر البيضة انت و ذوقك

نكمل قصتنا اللذيذة

الفوبيا دي يا مان

يتحدث عنها أحيانا النت و كأنها دور برد

شوية مناديل و شوب ليمون متين

و الزكام يطير

و شوية مصادر تقسم بأربابها أن ليس لها علاج أبدا

او للدقة العلمية

مافيش دكتور فيكي يا كرة يا أرضية قدر يوصل للعلاج الكامل

يعني لامؤاخذة مرض بطال بيقفش في الضحية و ميخرجش

يا أخي ده العفاريت بتطلع من الملبوس

و من صوابعه الصغيرة اللي في رجليه كمان

شوفت القدرة .. فوبيا فوبيا يعني

لا و اللي يغيظك بقه

و ابقي قول و النبي البقين دول

ان ماحدش عارف أسبابه ايه

يعني كوكب بحاله

بقاله زلايييين السنين بيبحث و يدرس

طلع القمر و خرم المحيط و بسم الله ماشاء الله بيعمل بني آدمين باستنساخ و حركات

و جه عند الفوبيا الاجتماعي و قال عفوا .. لقد اتشل رصيدكم

جتكو نيلة .. جنس بشري ما يعلم بيه الا ربنا

المهم .. خدت من وقتك انا عارف .. ماتبصش للساعة بقه عيب

اتفقت برضه المصادر كلها

على ان العلاج هام جدا و ضروري

الثيرابي

الاسم الشيك للعلاج النفسي

سيكو ميديسين

الاسم الشيك برضه للأدوية النفسية

المهم يعني لو تعرف واحد عنده فوبيا اجتماعية زقه عند دكتور نفساوي

*

معلش اضافة أخيرة قبل ما تمشي .. ماجتش على الدقيقتين دول .. اصبر

اخوك لما قرا الكلام ده

ماكدبش خبر

راح سائل فطحول من فطاحل الطب النفسي في مصر

مالكش دعوة قابله فين ماتبقاش حشري

اخوك سأله بمنتهي الألاطة

social anxiety disorder بالنوسبة للـ

شوف يا اخي الاجانب و شياكة اساميهم

راح الفطحول فشخ بقه متبسما و قام كارر الكام صفحة اللي قريتهم على النت

و كنت فاهم كل توت بيقولو و لا كأني كنت معاه من خامسة طب

و ناقشته و اتفذلكت .. عندي جوجل بقه

لحد ما زهقت من الهري و سألته م الآخر

بيتعالج يا شقيق

قام ساكت

انا قلت استأذن بقه قبل لما آخد الاجابة لايف اون اير

لحقني ينوبو ثواب

و قالي شوف يا زميلي ياللي فاهمني انت يا مركز

المرض ايا كان نوعه

له ثلاث درجات

الاول وقائي

يعني مثلا قبل لما ضهرك يوجع سيادتك تروح تكشف كده من نفسك

قوم مايجيلكش وجع في ضهرك ابدا بعون الله

و الدرجة الثانية

انك تصحي بتلطم من وجع في ضهرك

ساعتها يا أمور نخش بالدوا

نفع يبقي تبوس ايدك شعر و دقن

مانفعش يبقي هوب على الجراحة عدل

الدرجة الثالثة هي المعروفة باسم توو ليت

اي: بقه جاي بسلامتك دلوقتي

ماكنش ينعز

و هنا يتوجب عليك أن ترضي بالأتب اللي في ضهرك

تعيش بيه زي الجمل و تشوفلك ناقة تتجوزها و يهينيكو و يسعدكو في اي صحرا

و المرض النفسي كذلك بالظبط

يا بدري بدري

يا وقعت الطوبة في المعطوبة

و هنا اما دوا او جراحة

يعني جلسات كهربا و بلا ازرق بعيد عن حضرتك

يا اما جيت بعد الهنا بسنة و البس بقه يا معلم مرضك حبيبك

قولت والله كلام سليم معقول

صحيح المصري مصري برضه

و لا جوجل و لا ويكي

طيب يا دكترة يا حبوب

اعرف منين ان السيد المواطن العيان بهذا الرهاب اللعين في انهو حالة

لقيته يا خويا سهم و اتخرس

قال على حسب

و انا اللي يقولي على حسب ده مش بطمنله ابدا

زي لما تسأل هو العيان حيموت

يقولك على حسب

انت تقصد موت موت ولا موت حاجة تانية

المهم عشان انا بصراحة فاضي و شكلي عطلتك كتير

قالي بيبقي على حسب الاستعداد للعلاج

رجعنا لعلي حسب

قلتله طب بلاش دي .. لو الراجل المريض بالرهاب استعداده جميل و آخر حلاوة

العلاج بيقعد أد ايه

قال

برضه على حسب

قال ممكن تاخد اسابيع او سنين

طب يا فندم على حسب ايه بالظبط

قال على حسب يا اخي

انت ايه مش بتفهم

اعتذرت و انا بشتم اللي جايبينو في سري

و لأن القصة ابتدت بداية غامضة فهي انتهت هنا برضه نهاية غامضة

حتسألني ليه غامضة

حقولك على حسب انت تقصد ايه بغامضة

*

اخوك فضولي زيادة حبتين

في ظروف تانية اسمحلي اخليها غامضة برضه

سألت واحد نفساوي تاني

قلت له ألا صحيح يا ابو الدكاتير

القلق الاجتماعي مالوش علاج

الراجل انتفض بشمم و كرامة متأبية

و قال لا طبعا

مين التيت ابن التيت اللي قالك كده

ربك و الحق انا اتخضيت

قلت اخبي و بلاش افتن ان النت هو المصدر لحسن يعمل في الراوتر حاجة

قلت له فلان الترتاني

قال لي ده مابيفهمش حاجة

لا و قالها بأدب من النوع بتاع الواد ابن الجزمة ده حبيبي بس مابيفهمش

امال يا دكتور طمني

قال .. و شوف اجابته

هو لما اعراض معينة كانت بتظهر في مية من المية من المواقف بشكل لا ارادي و لا يوجد تحكم فيها

لما الاعراض دي تبقي في واحد من المية من المواقف وفي تحكم فيها و اصبحت ارادية ده مش علاج

قلت له آآآآه

اممممممم

يعني هي مابتخفش انما بتهدا يعني

طبعا البق ده في سري

و الا من حماسته كان لطشني

و راح استشهد لي بان امراض اصعب و بتخف

الشيزوفرنيا و الكانسر

و انا بصراحة ربنا عمري ما سمعت ان الشيزوفرنيا او الكانسر ليهم علاج

انما الراجل شكله طيب و مبيكدبش

على الاقل لحد اما ينصرف

*

المهم يا حبيب قلبي

الرهاب الاجتماعي كمرض بقه

بيقولك انه حاجة كده منيلة

بيخلي صاحبها يكره اي حاجة فيها احتكاك بالناس

و فرقوا بينه و بين القلق العادي اللي بيصيب اي حد

ان القلق العادي بيقعد وقت بسيط و يروح

انما القلق المرضي

بيفضل قاعد و مبرطع بالسنين

و مش بيروح و بيزيد

و بيتهبب على عينه يحرم صاحبه من ابسط عاداته

لمجرد ان فيها احتكاك بالناس

فبيتجنب على اد ما يقدر كل ما هو اجتماعي

بيبعد عن الانظار و يفضل العزلة

بيحب الليل اكمنه فاضي

و بيهرب من النهار اكمنه زحمة

يتألم من كونه محط انظار

ولو انه مش محط انظار و لا زفت

انما الفوبيا مصورالو ان كل الناس باصالو

فوبيا بقه

هو بالطبع بيعاني من ثقل هذا الظن

و بيعمل للخطوة الواحدة ألف مليون حساب

و بالتالي الخطوتين بالنسبة له بيبقو واخدين تفكير ايام

مع ان الموضوع ابسط من كل ده بكتييييييير

و مفيش حد مركز مع حد للدرجة اللي المرهوب متخيلها

انما تقول ايه فوبيا

طبعا ده بينعكس على الحركات و الكلام و الافعال

فتلاقيه بياخدها من قاصرها و يمتنع

لأن لديه شعور متمكن منه

انه حتما ولابدن

حيرتكب حاجة محرجة مالهاش لزمة

و تعرفه بسهولة على فكرة

تلاقي الناس كلها مفرفشة

و هو وشه أحمر و ساكت و متنيل و العرق مغرقه

الأدهي و الاغرب ان معظم المصابين عارفين انهم اوفر بس مش عارفين ليه

و بيكون عندهم قلق من الاشخاص الجديدة

و نسب الانتباه الذاتي تكون في القمة لديهم

و مجرد التفكير في اي موقف اجتماعي يشغل بالهم لأسابيع قبل و بعد الحدث

لدرجة ان الامر يوصل لتجنب التليفون و الفيس بوك يا مؤمن

و تجد الامخاخ تخترع اساليب هرب

منها الافراط في النوم او الحياة في الليل او الحوار بلا نظر الي العيون

*

طيب .. آخر حاجة عشان اسيبك تتكل و كلي ثقة انك حتسد لما تتسأل تاني

و الحل يا كبيييييييير

اولا و اخيرا

اللي عنده وجع في النني

بيروح لدكتور رمد

و اللي عنده وجع مشقلبه في ضرسه

بيروح لدكتور سنان

يبقي اللي عنده وجع في نفسيته

يروح لمييييييين

اسم الله عليك

دكتور نفسي

هناك بقه العلاج بيكون على كذا مستوي

في المستوي الادراكي

يعني انت بتفكر ازاي عشان توصل للقلق ده

و في مستوي التصرفات

يعني يحطك في مواقف معينة عشان يعالجك

و في المستوي البيولوجي

الاعراض الجسمانية مثلا

و ده بالدوا

و مستويات اخري هم بها اعلم

انما المهم المهم بقه يا حبوب

هو أخطر سؤال سألته للفطحلين المصريين

وهو سؤال حيوي

و يستمد قيمته انه من ارض الواقع الناشفة القاسية

و كان السؤال

يا دكترة

هل جه عندك حد عنده اضطراب القلق الاجتماعي و خف؟

و كان سنه كبير كده و كبره؟

أجاب الدكتورين

بنعم

*

اللهم لا سهل الا ما جعلته سهلا

و انت تجعل الحزن ان شئت سهلا