Tuesday, July 13, 2010

عن التمرد


تنبيه هام: كتبت هذه الكلمات في ظروف غضبي و مليئة بالنرفزة و السخط
رجاء: لأصحاب القلوب المرهفة .. لا تقرأ
اعتذار: لو قريت برضه و نفضت للسطرين اللي فوق .. فمعلش بقه .. كانت حالتي مش كويسة .. و البلوج ده بتاعي اكتب فيه على كيفي
*
ايه يعني
لما اتمرد انا
يعني هي جت عليا
ولا يعني الدنيا خلصت
‏*‏
ايه
عمرك ما شفت
شجرة خرمت الرصيف
و مهماش سير المرور
و حلفت لا تطلع وسط الطريق
‏*‏
ايه
عمرك ما شفت ست كبيرة
و كل حاجة فيها كبيرة
ماشية تدلع على شط مصيف
لابسة بمنتهي البرود
مايوه بكيني
‏*
ايه
ولا عمرك ما شفت
راجل سنانه بتقع و ضهره انحني
و شايل ورد و رايح من ورا احفاده
يتقدم لآنسة لسه جسمها فاير امبارح
‏*‏
ايه
عمرك ما شفت فنانة
بدأت مجدها
بفستان مبلول مبين حلمتها
بطول مسترش حتي فخدها
‏*
ايه
عمرك ما شفت خليجي
ضارب تي شيرت شبه كيس الزبالة

و زعطلون مجسم مخاصيه

و اللي فوقيه

*

ايه

عمرك ما شفت

بنت بواب مستغفلة اهلها

و نازلة تأجر نفسها

بخمسين حنيه في عربية او على الرصيف

و للبياتة أكلة و دش نضيف

*

ايه

عمرك ما شفت

واد عضلاته مفتولة

و اتقدم لبنت معقولة

لما نام معها و شبع

رملها الدبلة في وشها بصورة غير مقبولة

*

ايه

عمرك ما شفت

محجبة

لابزة بلوزة شفتشي

و بنطلون الواطية من لبسه تختشي

و بخصلة شعر مدلدلة

*

ايه

عمرك ما شفت

الملتحي

اللي من كتر الصلاة قورته اسودت

لما تتعامل معاه

تقول انا من السنة نفسي انسدت

*

ايه

عمرك ما شفت

واحدة لابسة اسدال

تشوفها تقول ده الاحتشام

تقف جنبها عربية

تركب في الحال

*

ايه

عمرك ما شفت

ولا

طول الوقت ليك مبتسم

و للود ليك بيرتسم

لحد ما ياخطف منك مصلحة

*

ايه

عمرك ما شفت

الخطيب بيحكي وصايا الحبيب

و خلص دعاه و اعلن الصلاة

و قصاد الجامع

قهوة عمرانة بالمشيشين

*

ايه

عمرك قبل كده

من أقرب الناس اتأذيت

و لما جيت

بعد ما هديت

توضح السبب

راجي بنبل ازالة الخلاف و بارادتك

كسر برضه بخاطرك

*

ايه

عمرك ما عشت

طول عمرك فاكر انك سليم

و عندك طموح عالي و اهداف في الصميم

و ذات فجأة تكتشف

انك عيان

انك مريض

و تعاني من الاكتشاف الأليم

*

ايه

عمرك ما قدرت

فلان

و اتعاملت معاه بمنتهي الصدق و الحنان

و لما مر الزمان

بدرت منه

حركات نقص و عدم امتنان

*

ايه

عمرك ما اتظلمت في الثانوية

و لا في درجات الكلية

و لا زقك التنسيق على مكان مهبب

*

ايه

عمرك ما سمعت

عن مصلحة

في اي مصلحة ما بتمشيش

الا بحباية فياجرا

او تربة او فرشة حشيش

*

ايه

عمرك ما عملت

حادثة

وانت كنت مية في المية في السليم

و نزل الافندي سمعك كلمتين

*

ايه

عمرك ما جربت

لما تتقفش في لجنة

و عساكر و ظبابيط يزنقوك

ورقة بعشرين تنقذك

*

ايه

عمرك ما سمعت

عن شاب انقتل

او ساح في دمه لمجرد هبل

او طفل بالصدفة اندبح

او حد آذي نفسه قدام كل البشر

*

ايه

عمرك ما شفت

اللي ما يسواش طالع فيها

و اللي يستاهل تقله دهب

مدفون و منسي في الحضيض

*

ايه

عمرك ما سمعت

عن زين الشباب

لما فارقتهم المرحومة أمل

راحوا يدوروا في حلم الهروب

رجعوا جثث

و سيرتهم تتحدف بالطوب

*

ايه

عمرك ما سمعت

عن اللي رسموا نبينا خنزير

ولا اللي بيقولو دينا دين حقير

ولا اللي بيقولو ان أمنا مريم زانية

ولا اللي كتبوا عن نبينا نوح انه شاذ

و لا اللي بيشتموا في الصحابة يوماتي بالمجاز

*

ايه

عمرك ما شفت

الحج للوجاهة

والزكاة اعلان دعاية

والصوم منعة أكل و شتايم مافيش مانع

والصلاة واجب روتيني

و الذكر و القرآن للشحاتة

*

ايه

عمرك ما سمعت

عن فريق في لعبة

لما أراد يكسب

استشار حيوان

و لا كأننا بنشوف قريش

و أزلامهم قصاد الكعبة

*

ايه

عمرك ما سمعت

عن كنيسة في ايطاليا

رهبانها ينادوا بالتسامح في الازمات

وهمه من جوه

نازلين تحرش في البنات

*

ايه

عمرك ما شفت

سفاح عايش في الامان

و حكومة مش لاقية مكانها ع الخريطة

و حكومة نجسة مدعومة م الامريكان

*

ايه

عمرك ما سمعت

عن بلد

تجاور بلد عدوة

بينهم حروب و دم

بس المسئولين الود بينهم ممتاز

لأ و كمان تصدرلهم غاز

*

ايه

عمرك ما سمعت

عن راجل شاطر

فوق العشرين سنة محافظ على شغله

رغم ان كتير من الناس مش طايقة صورته

و مع ذلك مشغل مراته معاه

و بيحاول يورث الشغلانه لابنه

*

ايه

بقه كل ده

عدا عادي

و انا بقه

لما اتمرد

تقول اصل و فصل

*

على فكرة

انا كان ممكن اكون

حد غيري

شخص تاني

بس ربنا

اختارلي أنا

ليه

هو اللي عارف

*

على فكرة

كان ممكن اكون

شغال في الفاعل

بتنفس تراب

و ايديا متشققة

بس كنت حبني للناس سكن

*

على فكرة

كان ممكن اكون

ضخم و شعري طويل

واقف على باب كازينو في شارع الهرم

أأمن لهو اللاهين

*

على فكرة

كان ممكن اكون

ويتر حرك في كافيه

انزل النسكافيه للهانم و البيه

يشربوا و يتمزجوا

و اطلع بتيبس انما ايه

*

على فكرة

كان ممكن اكون

سايس

احط طوبة هنا و قمع هناك

و اركن البنات المدلعة

و المس ايديهم بقلة أدب

و همه بيدوني الفكة

*

على فكرة

كان ممكن اكون

طيار

كل ليلة في بلد و كل نهار

اطلع بمهارة و لما آجي انزل

اسمع الركاب يسقفوا

*

على فكرة

كان ممكن اكون

كاتب شفيف

حسه نضيف

قلمه شريف

يقوم الدنيا بخط لطيف

*

على فكرة

كان ممكن اكون

من الاحرار

ظابط مناضل في مقدمة الثوار

يطلع حليم يغنيلي

و اطرد من بلدنا ملك حمار

*

على فكرة

كان ممكن اكون

صحابي

و اشيل سيفي في غزوة

و اطير رقاب

أعتي و أكبر الكفار

*

على فكرة

كان ممكن اكون

رائد فضاء

بشرب غدايا محلول محلول

و اتفرج بعينيا على السما الواسعة

و الكواكب و جمالها و النجوم

*

على فكرة

كان ممكن اكون

دكتور نفساوي

آخد بايد المهموم و المبتلي

اكلمه عنه وازيل بعون الله

اي جنون

*

على فكرة

كان ممكن اكون

رسام

في ايدا فرشة

و لوحة بيضا منورة و الوان

ارسم جمال الدنيا

و احط لمساتي

و ينشرح بسببها شخص

*

على فكرة

كان ممكن اكون

شيخ بجلابية

حافظ و صوتي يبكي

كل اللي يصلوا ورايا في الحرم

*

على فكرة

كان ممكن اكون

مخترع

بنسي الايام في المعمل

اطلع في آخر السنة

بدوا يشفي اللي فقد الامل

او جهاز

عشان احتياجات الناس تكتمل

*

على فكرة

كان ممكن اكون

مجرم خطير

اموت برصاصة

و اقطع الجثة و اطير

*

على فكرة

كان ممكن اكون

عازف جيتار

او عازف عود

صوابعي باللعب في الاوتار

تهز وجدان

مستمعين كتار

*

على فكرة

كان ممكن اكون

عصفور صغير

املا الصباح تغريد

فتفوتة تكفيني

و جناحاتي فين مانا عايز

توديني

*

على فكرة

كان ممكن اكون

قطة ملونة

عينيها تنور في الضلام

و كلها خوفها

م الكلب اللي متربص قدام

*

على فكرة

كان ممكن اكون

حصان أصيل

جسمه مبهر

و سرعته تشد العقول

في السبق رهانه مضمون

*

على فكرة

كان ممكن اكون

سمكة حلوة مزركشة

حوالي اعشاب كبيرة زاهية

و دايما دايما تلاقيني في الميه

و ماليش غير العوم غيه

*

على فكرة

كان ممكن اكون

صخرة كبيرة في الهرم

تقاوم تقلبات الزمان

و تكون من العجائب

*

على فكرة

كان ممكن اكون

نبات اخضر

فوق الغصون

اضلل ع البشر

و افرز ثمار

و اوهب لهم بقدرة ربي

هوا نضيف يتنفسوه

*

على فكرة

كان ممكن اكون

نجمة في قلب السما

بعيد بعيد مكاني

و يمكن يكون راح زماني

بس ضيي واضح للعيان

و بزين فوقيك المكان

و تعدني لما تكون عاشق ولهان

و تتونس بيا لما تكون في قلب البحر رسيان

و نوري الصغنن يديك أمل

و في ليلك و انت سرحان

اديك احساس بالجمال

و اشجعك على القتال

في دنيا ملغوصة

*

يبقي ايه يعني

لما اتمرد انا

و على فكرة

كان ممكن اكون

اي حاجة

في اي حتة

في اي زمن

بس ربنا اختارلي انا

ليه

هو الخبير

*

يا رب

انت الاله

واحنا العبيد

كلنا عبيد

عايشين من اكلك

و من شربك

و من هواك

ده حتي الفكر و الحركة و النصيب

من خزاينك

يا رب

يا اللي قدرتك مالهاش حدود

ياللي انت ومفيش غيرك

صاحب الخلود

يا خالق كل شئ عارفينه و منعرهوش

و ممسكش تعب أو لغوب

و معجزاتك يوماتي بتحصل

و كرمك ع الكافر مش منقطع

و سترك ع العاصي مستمر

و باب توبتك عمره ما انقفل

و حبك لينا و سر خلقنا

يا رب يا كبير

يا رب أمرك ما في قوة تمنعه

و عطفك ما في شئ يساويه

و قوتك ما في شئ يضاهيه

و حكمتك ما في حد يحيط بيه

اوعي تسيبني

او تتخلي عني

ده انا من غيرك ماسويش

8 comments:

Anonymous said...

انا مقدرتش اسكت للمره التانيه
البوست ده مالوش حل ولو انه قبيح حبتين بس والله العظيم موهوب ياد
برافو يا درش للمره التانيه
وع البوست ده تحديدا الف برافو
سلام بقي وخف علشان انت عارف انا مبحبش اكتب ع الكيبورد
عمك ابراهيم

dodda said...

t3raf ana mesh 3arfa a2olk eih 3ala elpost.. we 5soosan en ana mn elli lihom 7ta kbira fi awel satrin...
we etkasaft awi mn elkalam eli howa shwaya keda..

bas mabsoota awi enk etmardt
we fi a5er elkalm lrabena rg3t
rabena m3ak ywaa2k daymn
we kol tamarod we enta b5ir.

tani 7aga 3awza a2olk bgad merci awi 3ala comment 3andi la2eno bgad fara2 ma3aya awi la2eni bgd m7atag afadfad bas mesh 3arfa!!!
el7aga elmohema awi ba2a
en m3 enena 3omrena ma t2abelna bas bgd e7na so7ab awi
we ya rab tfham elklam da zay ma ana 3araf enk 7tfhamo

rabena ykremak

مصطفى محمد said...

ya anonymous ya brahym

أولا: تعيش و متسكتش

ثانا: البوست ده ابتديته بنية معينة فادتله العنوان ده و لقيتني كتبت في سكة تانية و بعدين سرحت مني خالص .. قمت طلعت فوق و كتبت التنيه و الرجاء و لما حسيت ان العملية قبحت كتبت الاعتذار .. عموما هي حالة و حتروح ان شاء الله

رابعا: اتنين برافو و اتنين موهوب ورا بعض .. يالهوي .. ده كتشير عليا و ربنا .. مع ان في كلام كتير محتاج يتظبط اوزانه و قافته ..

خامسا: لا ماتخفش .. حاليا طاله معايا اشعر .. و انا اساسا مبحبش الشعر .. و اللي جاي لو جه حبقي مجرد كلام جايز حتي مايتفهمش

سادسا: اقعد بالعافية يا كبير .. سلامة صوابعك يا رشيق

:‏)‏
:‏(‏
و انا اقصد الفرحان

مصطفى محمد said...

dodda

أولا: مصدقك .. عشان كده كتبت الاعتذار

ثانيا: و انتي بالصحة و السلامة .. عقبال ما اقرا تمردك ان شاء الله .. انا رأيي ان مهم اوي الواحد يعمل وقفة مع نفسه كل شوية و يتمرد على عيب من عيوبه اللي متأصله فيه .. حتي لو خرجت بشكل شوية كدا...

ثالثا: لا شكر على واجب .. انتي من اول اربعة عبروني في عالم التدوين و بادروا باضافة لينك بلوجي عندهم وانا المدون المجهول بينما همه مدونين كبار .. ديدو و انتتي و مادو و مروة الزارع .. و انا أكن لثلاثتكم امتنان كبير .. و سعيد ان تعليقي عندك فرق معاكي .. ربنا يديم المعروف البلوجاوي

رابعا: الفضفضة آلية انسانية ثميينة تزيح عن الصدر الثقل و تخفف الهم و تصبر الانسان على ما بلاه .. و أفضل حاجة في الفضفضة هي الانفتاح الكامل في الحديث مع (في حالتك) صديقة مقربة او اب حنون او ام مقربة او زوج مستمع مهتم .. و من بوستاتك السابقة عرفت ان انتي متجوزة .. و أسمي حاجة في العلاقة بين شركاء الحياة هي الفضفضة لأنها بتقرب الافكار و بتوضح الطبايع و فوق ده كله بتقرب المسافات و تمتنن العلاقة الروحية و تعطي دعم نفسي قوي .. عذرا ان كان نصحي السابق فيه تدخل في حياتك بس ده رأيي

خامسا: احنا صحيح ماتقبلناش انما قرينا لبعض و يمكن دي سمة مش بتتوفر حتي للصحاب اللي بيتقابلوا على طول .. عموما و كما ذكرت من قبل .. ربنا يديم المعروف النتاوي البلوجاوي (لا أخفيكي سرا الا اذا كان لخطيبتي المستقبلية رأي تاني)

سادسا: و يكرمك انت كمان .. و منورة البلوج على طول

:‏(‏

مصطفى محمد said...

معلش عيب فني في الكتابة
اقصد
:)

مصطفى محمد said...

ya dodda

معلش نسيت

اولا: و نوسة و دي جا فو برضه من اوائل اللي اضافوا لينك بلوجي عندهم .. و أكن أيضا لهم امتنان كبير .. صراحة اتكسفت انسي حد

ثانيا: بالنسبة لكلمة رجعت لربنا .. يا دودا .. هو احنا لينا غيره .. صدقيني و عن خبرة .. مفيش حد في الدنيا بيسامح و يحن قد ربنا مهما كنت غلطانة .. ده حتي من كرمه .. لما العاصي يتوب يحول سيئاته حسنات .. مرة عمر بن الخطاب دخل على الصحابة و قال متفاخرا انا اكثركم حسنات .. اندهشوا اذ لم يعهدوه متفاخرا .. و لما سألوه اشمعني .. قال لهم اصل انا اكثركم سيئات في الجاهلية .. و لما أسلمت ربنا حول سيئاتي حسنات

:)

dido said...

السلام عليكم
انا اهو موجوده والله بس الدنيا بتلهي بقي غصب عني ثانيا انا قريت البوست اللي قبل ده بس ده جاااااامد موت مع انه فيه كلام صريح شويه بس انا حاسه انها طالعه من حاله غصب ربنا يصلحلك الاحوال ويبلغك رمضان وانت في احسن حال يا مصطفي
وبجد ابتسم واضحك الحياه قصيره اوي متعشهاش في نكد مش ناقصه
ربنا يسعدك :)

مصطفى محمد said...

dido

و عليكم السلام و رحمة الله و بركاته

اولا: ياااااه .. ده ايه الهنا ده .. منورة البلوج

ثانيا: ربنا يعينك .. بس لي تهجري بلوجك كده .. دي الكتابة بتريح

ثالثا: الحمد لله ان الكلام عجبك ولو اتك لخبطيني و مش فاهم انهي بوست قصدك عليه

رابعا: آمين .. قادر يصلح كل شئ .. و عشمي فيه كبير

خامسا: ياااه رمضان .. آمين و انتي كمان

سادسا: هي فعلا مش مستاهلة نكد .. بس النكد للأسف جزء من نسيجها .. و مابقتش افكر ازاي معيشش في نكد .. بقيت افكر ازاي استثمره .. يعني بدل ما يبقي مصيبة تحط عليا تهدني .. يبقي رأس مال لتصرفات و تفكير و قرارات مفيدة .. خاصة ان انا راس مالي في الحياة كبيييييير

سابعا: على قد ما الحياة فعلا قصيرة .. على قد ما بقيت احس اليوم طويييل و الحياة بطييييئة .. مش عارف دي بركة و لا غتاتة ولا ايه .. مرة سمعت شيخ باكستاني بيوصف الحياة بشكل جميل أوي .. قالك الحياة الدنيا قطرة من خلود الانسان بعد الموت .. و القطرة جزء تافه جدا .. ادي مثل بجسم الانسان . قالك الجسم ده كل .. و الدراع مثلا جزء .. و لو قطعنا حتة لحم من الدراع ف دي قطعة .. و لما تقع نقطة دم من حتة لحم فدي قطرة .. قال بقه ان الحياة الدنيا دي كلها قطرة و خلود الانسان بعد الموت في الجنة ان شاء الله هي الكل

ثامنا: و يسعدك انتي كمان .. سعدت بتعليقك

:‏)‏
:‏(‏
عيب في الكيبورد
اقصد الفرحان