Friday, August 28, 2009

عن جامع عمرو


على سور جامع عمرو


مايكات


قرآن بصوت جميل


و ناس و هلمة رايحة جاية


*


على سور جامع عمرو


واحد بيصلي على فرشته


مدخلش و متسألش ليه


و عسكري لابس اسود


بيسجر قدام مكان خدمته


و رتبة بكرش و لاسلكي


لابس ابيض نضيف


واقف طول وقت الصلا


يلمع في جزمته


*


جوه جامع عمرو


راجل وشه ملهوف


على ثواب القيام


قدامه زمزميته


و في ايده مصحف بيتابع القراية


وفي قلبه شوق كبير


و راجل تاني بيبكي


بحرقة


على عمرة فاتته


بسبب انفلونزا الخنازير


*


جوه جامع عمرو


راجل صلي أربعة


و ماشي مضطر


وراه مشاغل


و راجل هيكمل التمانية


مدايق


نفسه يكون وراه مشاغل


*


على سور جامع عمرو


راجل بينادي على سراويل


و بكل الالوان


و عمره ما لبس جلابية السنة


و شابة أمورة في اسدال


بتبيع للناس الذكر و السبح


و مستنية النصيب و الرزق


*


على سور جامع عمرو


عيال بعجل و بمب


و ستات قعدة بتعمل أبصر ايه


و رجاله سارحة بفوانيس و كور كفر


*


بره جامع عمرو


في قهوة عمرانة بالزباين


أهلها مجاورين للجامع


و عمرهم ما فوتوا شيشة العشا


و ست تخينة لابسة اسود


بقدرة قادر تسد طريقك


و باتنين جنيه فضة


تدعيلك


*


على باب جامع عمرو


راجل قاعد على الامانات


و يتفرج على المصلين


و راجل طالع بكذا فردة شبشب


و راجل داخل حافي


*


جوه جامع عمرو


واحد واقف في الهوا


يصلي


و في ركن بعيد


واحد قاعد بيقرا


و قدام خالص


واحد طلع الشخير من بقه


*


على سور جامع عمرو


وقفت حيران


انا العبد الغلبان


هي الناس مش عارفة


ولا مصهينة


*


على سور جامع عمرو


موبايل بيتعمل سايلنت


و موبايل بينقل شتائم


*


على سور جامع عمرو


واحد بسبب مائدة الرحمن


مابقاش جعان


و واحد من اعلانات التلفزيون تعبان


و واحد روحه تعبانة


و واحد جسمه عيان


و واحد في مصيبة غرقان


و واحد جي يتفرج على الحجارة


و واحد جي يقعد عشان يحس بالجلال


*


على سور جامع عمرو


ربنا سايب اللي يسرق


يسرق


و اللي يخشع


يخشع


و اللي مصدق بيوم اللقا و بيسرق


قلبه بيتعذب


و اللي بيصلي اكمن الناس بيصلوا


قلبه بيتفسح


*


جوا جامع عمرو


ناس كتير بيصلوا


و كأن الجوامع التانية


فاضية


و شباب بيملوا كولمنات الميه


و كأن الشباب كل الشباب


هادية


و رجاله قاعدة في ركن


بيستقبلوا دم المتبرعين


كأن مصر كلها


خاشية


و أول ما اخرج


عربية تزنق اختها


و لسان يعلن للسما السابعة


ان الدنيا مش سايبة


*


في جامع عمرو


انا حيران


اتفرج على ناس اشكال والوان


و لولاك يا رب


كان زماني خيبان


و لا يمكن انا خيبان


و واحد تاني بيتفرج على


و بيقول في سره


لولاك يا رب


كان زماني زيه


*


يا رب عمرو و جامع عمرو


ماليش حد غيرك


امتي بقي حتظبط


5 comments:

Ghada said...

Gamel 2we 2we deket el tafasel ya Mostafa :)
Be3'ad el nazer en leia ba3d el ta7afozat bas el bost gamel

Ana 7aset wana ba2rah enny a3da gowa game3 3mr :D

Game3 3mr men el gawame3 elly leha sha3bia kbeera 2we, we yestahel ennak tekteb 3an kol elly beye7sal 3ando we gowah

Rbna ytakabel menna we menkom

Bas ana leia estefsar so3'aier:
Eshme3na game3 3mr elly katebt 3ano?

mado80 said...

مصطفي محمد
صديقي العزيز

ما هذا الجمال
لوحه فنيه رائعه مرسومه بكلمات مصطفي محمد
علي فكره زي ما بتقول غاده انا حسيت كمان اني جوه جامع عمرو بجد

انت روحت السنه دي جامع عمرو ولا ايه
:)

تعرف ما روحتهوش ولا مره في رمضان بس اسمع انه حاجه تانيه في هذا الشهر الكريم
يا بختك ياعم

تعرف يا مصطفي هنا في السعوديه وفي الرياض بالتحديد لا تشعر انك في شهر رمضان لولا صلاه التراويح وخيم افطار الصائم اللي زي موائد الرحمن عندنا
طبعاهذا باستثناء مكه والمدينه

Anonymous said...

السلام عليكم
انا الدكتور محمد احمد
ممكن اسال الاخ مادو هوه غلط فيه مرتين علي اب اساس اولا مش انا اللي كتبت اخر تعليق وواضح ان فيه واحد كتب علي لساني كلام بس انا عايز اسال هوه الاخ مادو افترض علي اساس ايه ان انا وعموما انا ممكن بسهوله جدا ارد وبكلام اشد تاثيرا من الكلام اللي انت كاتبه
عموما ربنا يسامح كل جاهل ويعفو عنه
انا منتظر اعتذار
وشكرا

مصطفى محمد said...

ghada

1- wallahy el 7amdo lillah inaha 3agbaaky, el mawdoo3 3obara 3an tafaseel bas, we shee2 sa3b in mogarad tafaseel te3mel soora gamaliya

2- la la la, yareet te2ooly ta7afozaatek, howa ya3ny lazem asma3 kalam kowayes bas?

3- game3 3amr 2wel game3 fe afriqya kolaha, da 3'eer inny basally feeh el tarawee7 el yomeen dool, bas

:)

مصطفى محمد said...

مادو
صديقي العزيز

ينهار ابيض .. هو عجبك برضه؟
ده انا كنت بكتب و انا حاطط ايدي على قلبي خايف ما يكونش جميل و مجرد سرد تفاصيل .. الحمد لله

بالظبط كدا .. اليومين دول بصلي هناك .. و لما لقيت متناقضات الدنيا كلها في الجامع ده .. لقيت نفسي بكتب الكلمتين دول

و فعلا الصلاة فيه حكاية .. ده طلع اول جامع اتبنا في افريقيا كلها

غريبة ان رمضان السعودية مش تمام .. مع اني افتكرت العكس .. على العموم اهو التراويح برضه موجودة عندهم .. ربنا يصبرك و يكرمك

آه بالمناسبة .. الدكتور حول عليك .. استلمه بقي .. انا حريح شوية

:)