Saturday, January 19, 2008

عن مصرنا


بالطبع

كنت أود لو أن ذوي العقول الناضجة

و ذوي الخبرات الثقيلة

و ذوي التقديرات الصائبة

من أصدقائي

أو

أن أشاركهم جلسة ولو أسبوعية

لأستمع لتحليلاتهم

لأنصت الي تفسير منطقي

للخراب المسيطر

و لكن .. للأسف لا أعرفهم

*

عوضني ربي عن هذا

بالشخصيات التي ألتقيها

سواء في المقهي

الكافيه

الجامعة

الشارع

العائلة

أي حاجة يعني

*

مصرنا

تشغل حيز من تفكيرنا

كما نشغل حيز من أرضها

كما نتبادل حيز من الأسي

مصرنا تنطبق عليها نشيد

"الدنيا خربااااااانة"

و كنت أود

مرة أخري

لو أجلس مع معاصري أزمان مصر الماضية

ليقدموا لي أسباب لما أراه ماثل أمامي من

........

المهم

أعرض رأي أبرز و أميز ما سمعت

مصادري

ذكرتها أعلاه

*

النظرية الأولي

"القرص من لقمة العيش"

صاحبها : عم شعبان

الرجل الذي ظل يتحسر على أسعار الحشيش

و يندب غلاءه المستفحل

مؤكدا على اعتدال سعر القرش (الحجم الذي يشتري به الحشيش) أيام السادات

في مفارقة لطيفة : عدم استقرار حتي أسعار الكيف

المهم

انفردت به ذات يوم

و قد كان يتابعني في المقهي

و يتابع الجرائد التي أغطس فيها منذ وصولي حتي انصرافي

و كانت أيام حرب حزب الله المظفرة

الكلام جاب بعضه

رغم اني كنت أتجنبه

و اتعمد ذلك

الكلام في السياسة لا يجلب سوي الهم و الغم و حرقة الدم

بس.... الكلام اتنيل و جاب بعضه

طرحت المظاهرات نفسها علينا

سألت لم لا نتظاهر

و هنا انفجر العم شعبان

و أفرج عن النظرية التي كانت حبيسة صدره

الناس ليه ما بتتطلعش مظاهرات؟

أو قل قلة تطلع

ليييه؟

لأن الناس لا تضمن أن ترجع بيوتها لتؤكل أولادها

الناس زمان تطلع المظاهرة ترجع تاكل و تشرب

تعتقل جايز .. انما الأب اللي طافح الخرا في الشقا

هيشوف ابنه و بنته بيطفحوا

انما الأب و الأم دلوقتي

بيطلع تلاتة دين أبوهم

و ولادهم من القحط بيسفوا التراب

ازاي بقي يسيب شغله و يطلع في مظاهرة؟

الحكومة دلوقتي قارصة الناس من لقمة عيشها

الرغيف بقي غاااااالي

السكر

الزيت

(و سب قليلا مستغلا المناخ الذكوري)

الحكومة حتفضل تعمل كده

و احنا حنفضل ساكتين

ليه

عشان مقروصين

*

النظرية الثانية

"تغطية اليوم"

الأدب الجم في الظاهر

المختلط بطول الشكوي من الأولاد

أفرز عم سعيد ذات انفرادة به

ما حبسه هو الآخر و كان من نصيبي

عم سعيد افترض ان يومه

مثلا

يصرف فيه مية جنيه

مثلا يعني

هناك سلسلة من النصابين يحتلون كبري المناصب

يمنعون المائة الجنيه من الوصول الي جيب عم سعيد

مثلا برضه

عم سعيد مازالت مطالب بقيمة مائة جنيه تطارده

و لكن المائة جنيه نفسها لم تصل

اذا

مثلا

توجب على عم سعيد

أن ينصب على من تحته

أو يتملحس على من فوقه

أو أن يتشقلب و يتنطط ليحصل على المائة جنيه

و لكن بذلك يكون من تحته قد تعطل

فتستمر السلسلة البغيضة

و بذلك

يكون هناك ناس في آخر السلسة

لن يصل اليهم اي حاجة

و لا يوجد من يستطيعون النصب عليه

..............

كان السؤال الذي طرحته على عم سعيد

تفتكر لو مبارك اتغير مصر حتتغير؟

قال : كمقدمة : العيب فينا

*

هذه قناعاتي

بالفعل يمر الانسان المصري

بأيامه

و يثبت كلا من عم شعبان و عم سعيد صحة قولهما

و يتفق الجميع على أن مصر تسير

فقط

لأنها مذكورة في القرآن

بس

انما هي غير كده

خرباااااانة

*

(بشري لصائمي عاشوراء)

(غفر لكم العام الماضي)

اللهم احمي المصريين من حكامهم

و احمي المصريين من المصريين

و ارزقنا الحاكم الجدع الل عينه تبقي مليانة

و يعرف يظبط اللي تحتيه

آميييين



14 comments:

mado80 said...

جميل البوست يا مصطفي والأراء اللي انت ذكرتها دي بتمثل وجهه نظر شريحه كبيره من المصريين للأسف

بس بجد الكلمه اللي في الجون هو اللي قالو عم سعيد (العيب فينا) تعرف ليه لأنه احنا شايفين كل اللي بيحصل فينا ده ومع ذلك لا مبالاه

كل التحيه وكل التقدير ليك يا مصطفي

مروة الزارع said...

بجد يا مصطفى بوست هايا ورائع ومعبر

الله ينور عليك

انا مقصرة فى حقك سامحنى بس غصبن عنى

..............

انا يشرفنى احط مدونتك فى المفضلات عندى بعد اذنك

دكتورة سنان said...

انا بطلت اقرا جرايد
وبطلت اشوف الاخبار
وبطلت اتكلم فى السياسه
مفيش فايده
يعنى لما نقعد ونتكلم فى مشاكلنا وحالنا المايل
هيتعدل مثلا؟
الواحد ساعات بيحب يتكلم ويطلع اللى مدايقه يعنى من البلد الحلوه دى بس اهو كلام مش هيزود حاجه غير ان الواحد بعد مابيتكلم بيطلع الطاقه اللى عنده ويرتاح
لكن الاسعار هتفضل تغلى
وهتفضل الحكومه كاتمه على نفسنا
وهيفضل اللى فوق فوق واللى تحت تحت

كلبوزة لكن سمباتيك said...

الحكومة الله يعمر بيتها عارفة اننا شعب مسرف ابن ستين في سبعبن علشان كده المائة جنية مش بتوصل لجيب عم سعيد علشان ميرحش يشتري قرش حشيش


خلي بالك من دماغك


تحياتي

walaa said...

فعلا انت كده جبت من الاخر يا مصطفى العيب فينا مش حد تانى
احنا اللى ماشين وعاملين نفسنا مش واخدين بالنا لازم احنا اللى نتغير الاول ونغير البلد معنا وعلى راى عم سعيد لو مبارم مات ايه اللى هيحصل طبعا ولا حاجه علشان احنا مش هنالا
ولاء

مصطفى محمد said...

مادو 80

الله يكرمك على المجاملة
بس لي بتقول للأسف .. ده لو الناس كلها فهمت العيب حتحلو
و بعدين انا عارف ان فيه لا مبالاة .. انا بسأل ليه .. ايه رأيك انت يا عم مادو
مع تحياتي

*

مروة

بجد مجيتك عندي هي الهايلة
و ينور عليكي كمان
على فكرة مفيش تقصير ولا حاجة
و على فكرة بقي انت مش عارفه قد ايه انا مبسوط ان لينك مدونتي هيبقي عندك .. و الله انا (من غير نفاق) اكتر من متشرف و مزقطط

*

نوسة

لا حول ولا قوة الا بالله
ليه كدا بس
انا على فكرة بتكلم في السياسة أحيانا
لأن يقين عدم تغيير الأحداث مستقر عندي
فقربت أتجنن .. فقلت أحاول أفهم .. يمكن متجننش

*

سمباتيك

ههههها
صح كده .. تمام
الحكومة لا تريد لشعبها أن يصل للحشيش
فمنعته الرزق
ههههههها

*

ولاء

انا على الفيس بوك مرة أغراني حوار احنا اللي نغير البلد .. و كنت حعمل جروب اسميه
" اسكت .. مش انا اللي حغير الدنيا"
و كنت ساعتها في حالة من حالات التفاؤل
بس حالة الاحياط لحقتني و ضربتني على ايدي و فهمتني غلطي
انا غيرت نفسي يا ولاء .. بس ده فقط اللي قدرت أعمله
تحياتي

*

mado80 said...

ازيك يا مصطفي عامل ايه

أنا في رايي يا مصطفي ان المشكله مش في عدم فهم الناس للعيب اللي فيها أو للقرف اللي هي فيه المشكله انهم عارفين الدنيا ماشيه ازاي في مصر، يعني أنت أقعد مع أي حد في أي حته في مصر وأتكلم معاه هاتلاقيه يشرحلك اللي احنا فيه ولا أجدع محلل سياسي ومع
ذلك ولا اي حاجه يعني كلام وبس


مشكله اللامبالاه دي بقي يا درش محيراني أوي يعني مش لاقيلها سبب ، يعني لما تكون العيشه فل والحال عال العال يبقي فيه عزر ممكن الواحد يقوله يعني مثلا ممكن تكون الناس خايفه علي البغدده اللي هي فيها انما لما تبقي العيشه زي ما أنت شايف يبقي ايه سبب اللامبالاه هو ده بقي اللي هايجنني ، يعني هاقولك حاجه هي ممكن تكون خارجه عن موضوعنا بس لازم تتقال علشان تشوف احنا في مصر فيه أد ايه حجات غريبه بتحصل صراحه ومش لا قيلها سبب

انت مثلا لما الحاجه بتغلي سعرها ايه المفروض اللي يحصل المفروض ان الأقبال عليها يقل لأ ده في مصر الأقبال بيزيد مش بيقل ، هتلاقي حجات من دي كتير في مصر ، مصر بلد المعجزات صحيح

المهم يا صاحبي لما تعرف ايه أنت سبب اللامبالاه اللي احنا فيها تبقي تقولي علشان أنا دماغي بدأت تلسع بجد

سلام يا مصطفي وتحياتي وتقديري ليك يا مان

مصطفى محمد said...

مادو 80

اشكرك على الرد مجددا
مبدئيا .. انا مش محلل كويس .. انا ماليش في السياسة نوهائي .. علشان كده بحاول اطلع من كل حد تحليل .. و هم زي ما انت بتقول .. كلو محللين
ثانياً .. معجزات فعلا .. اتفق معاك و اشكرك على اضافة الجديد لي
ثالثاً .. اوعي تلسع .. مين هيحلل؟
تحياتي اليك مجددا

walaa said...

اخواننا فى غزه محاصرون ومعذبون لايجدون طعام ولا ماء ومشردون ويجب علينا ان نفعل لشىء لنصرتهم لذلك قرر مجموعه من المدونين الذهاب الى معبر رفح لكىيرفعوا المعاناه عن الشعب هناك لو تقدر تشارك او اى حد يحب المجيىء معك
يا ريت تبلغنى

السكندرى said...

الأخ السيد شبل

جزاك الله خيرا على ابداءك الإستعداد للمشاركة فى القافلة المتجهه إلى رفح

لو كنت جاد فعلا
أرجو التأكيد على مدونتى

وإرسال رقم موبايلك على بريدى الإلكترونى
bakrawy9000@yahoo.com

وأرجو تحديد محافظتك
لأن هناك منسقين فى المحافظات
وجزاك الله خيرا

السكندرى
وأنا موجودة

عاشقة الوطن said...

السلام عليكم

ازيك يامصطفي

اولا مصرنا هى مصرنا
بحلوها ومرها
بس بحكامها لالالا
انت عارف ان مصر فيها بلاوى كتير
واللى يشوف بلوة غيره تهون عليه بلوته

واللى يشوف حكام العرب يهون عليه اى حاجة تانية

ربنا يكون فى عونك يامصر ويكون فى عون العرب


ربنا يرحمنا برحمته ان شاء الله

تحياتى يامصطفي
وجميلة مدونتك

مصطفى محمد said...

عاشقة الوطن

اشكرك على الزيارة و على التعليق
و ادعي لنا كلنا بالرحمة
فنحن نحتاجها

تحياتي

paranoia,magnetic & dramatic girl said...

ازيك يامصطفي
اشكرك جدا لتشريفك مدونتي
وشكرا لرأيك
..
مش عارفة ليه الحوار الي انت كاتبه ده محسسني انك قاعد كنت مع احمد فؤاد نجم
ذكي جريء سليط اللسان
رغم ان الي انت قاعد معاه راجل بسيط بس له افكاره
مدونتك هصنفها سياسية.. في مدونات كده اصحابها بيحسوا بنبض البلد ومدونتك منهم
استمر يامصطفي ارائك هدافة
بس ليا ملاحظة بسيطة
الكلام انت ليه كاتبه علي الجانب الايسر؟
لو كتبته علي الجانب الايمن او المنتصف هيبقي اريح للعين
دي ملاحظتي الوحيدة ارجو متكنش ضايقتك
الله حافظ
دودو

مصطفى محمد said...

دودو

اشكرك على الزيارة و التعليق
و ذلك لأني سررت بهما
و عاوز اقولك حاجتين
واحد .. بدأت المدونة دي من يوليو السنة اللي فاتت.. و كنت بتجنب دايما الكتابة في السياسة .. على العموم اشكرك على كلامك المؤثر

اتنين.. اول تدوينة ما كنتش فاهم اي بطيخ .. فطلع الكلام من اليمين .. دلوقت طبعا اعرف اظبط .. بس زي ما تقولي كده .. اول تدوينة بحبها اوي فسبت المدونة كلها يمين

تحياتي و تقديري